أهل المغنى ( زجل )

( يا اهل المغنى دماغنا وجعنا )
سكوت على طول لله
فين المعنى اللى يرجعنا
مع كلماته نقول الآه
فين الصوت اللى يسمعنا
وف نبراته نقول الله
كله نعير وصفير صدعنا
والله نا نعرف ايه معناه
=============
تلقى اللحن كأنه خناقه
وصريخ طالع نازل فيه
وآلات داخله اللحن عياقه
واللا الطبل يا عينى عليه
طبل يرقص اتخــن يــــاقه
ويرقص هــــانم مع بيــــه
اتمنــى انى تجيـــلى جــراءه
واسأل مره واقول جرى ايه
=============
واللا سى فـــالح لمـــا يغنــى
تلقى الرقص معــاه شغــــال
وبازعاجه وصوته سورنى
ويقـــول لك قـــال ايــه موال
خلى ودانـــى بتزعل منـــــى
ولا تسمــعش لأى ســــؤال
وأبوس رجــلك تبــعد عنـى
ومــا تلوثـــش الجــو امـــال
==============
واللى يعيــد أغانيــه قال ايــه
ناوى يا عينى انه يطورهــه
ولاهوش دارى باللى جانيـه
وانه بايده خلاص دمــــرهه
بيقــول لك زمنى وبجـــاريه
راح اجيب الفيديو يصورهه
ومعــاه بنت تدور حواليــــه
يتغاـــزل هوه ف منظــرهه
==============
بقت الزيــــطه بتملا الدنيـــــــــا
والضوضاء دى ف كل مكــان
ولا فيــش حته بتسكن ثــــــانيه
يرتــاح فيهــا مريض تعبـــــان
أصوات عــاليه وهى الجــانيه
على أسمـــاعنا وذوقنــا كمـان
وأغـــانى ما تنفع ساكســونيه
بتدمـــــر روح الانســــــــــان
==============
ليــه بتخلـــو الفن تجــــــاره
وترخســـو فى الغـــالى كتير
واخديـــن م التنميــــه ستـاره
بس الواضـــح فـرق كبيــــر
فى الأغنيـــه بحس بغـــــاره
وثوره تخـلــى العقل يطيـــر
مش راح اقول أبدا يا خساره
لســـــه الفــن يا دنيــا بخيـــر